دنیا کے سب سے مہنگے فٹبالر پال پوگبا مکہ میں

 دنیا کے سب سے مہنگے فٹبالر پال پوگبا ان دونوں مسلمانوں کے سب سے مقدس
شہر مکہ میں ہیں جہاں وہ اسلامی مہینے رمضان کے دوران عمرے کے ادائیگی  کے لیے گئے ہیں۔ فرانس سے تعلق رکھنے والے فٹبالر نے اتوار کو خانہ کعبہ کے قریب سے اپنی ایک تصویر شائع کی اور لکھا ’سب سے خوبصورت چیز جو میں نے اپنی زندگی میں دیکھی۔‘ اس کے علاوہ انھوں نے ایک ٹویٹ بھی کی جس میں انھوں نے سب کو ’ماہ رمضان کی مبارکباد دی۔‘

خیال رہے کہ 24 سالہ فٹبالر گذشتہ سال اس وقت دنیا کے سب سے مہنگے کھلاڑی بنے تھے جب انگلش فٹبال کلب مانچسٹر یونائیٹڈ نے آٹھ کروڑ 90 لاکھ پاؤنڈ کی ریکارڈ قیمت کے عوض اطالوی کلب یووینٹس سے ان کی خدمات حاصل کرنے کا فیصلہ کیا تھا۔ پال پوگبا نے یورپا لیگ کپ کے فائنل میں مانچسٹر یونائیٹڈ کی جانب سے شرکت کی تھی۔ سیزن کے اختتام پر پال پوگبا نے ایک سوٹ کیس کے ہمراہ اپنی ایک ویڈیو جاری کی تھی جس میں ان کا کہنا تھا کہ ’وہ عبادت کی غرض سے سفر کر رہے ہیں، اور اس دوران وہ عمرہ کی ادائیگی کریں گے۔‘ اطلاعات کے مطابق اس سے قبل بھی پوگبا نے ایک مرتبہ مکہ کا سفر کیا تھا جب وہ حج کی ادائیگی کے لیے گئے تھے۔

مقبوضہ کشمیرکے کرکٹرز کا پاکستان سے اظہار محبت

مقبوضہ کشمیرکے کرکٹرز نے پاکستان ٹیم کی سبز یونیفارم پہن کر میچ کھیلا جب کہ میچ سے قبل پاکستان کا قومی ترانہ بھی احترام سے پڑھا گیا۔ انٹرنیٹ پر ایک وڈیو تیزی سے پھیل رہی ہے جس میں مقبوضہ کشمیر کے گندر بل ڈسٹرکٹ میں 2 ٹیمیں کرکٹ میچ کیلیے آمنے سامنے ہیں، ایک ٹیم نے پاکستان کرکٹ ٹیم کی یونیفارم پہن رکھی ہے جب کہ دوسری ٹیم نے سفید کٹ پہنی ہوئی ہے، میچ شروع ہونے سے قبل احتراماً پاکستان کا قومی ترانہ بھی پڑھا گیا۔  بھارتی خبر رساں ادارے کے مطابق یہ میچ ایسے موقع پر کھیلا گیا جب بھارتی وزیر اعظم نریندر مودی نے مقبوضہ کشمیر کا دورہ کیا۔

گندر بل کے مشہور صوفی بزرگ بابا دریا الدین کے نام سے منسوب ٹیم کے پلیئرز نے کہا کہ ہم مسئلہ کشمیر کو مختلف انداز میں اجاگر کرنا چاہتے تھے، ہم کسی سے خوفزدہ نہیں ہیں کیونکہ اللہ ہمارے ساتھ ہے، ہم نے کسی کو تکلیف نہیں پہنچائی، صرف ایک کرکٹ میچ کھیلا ہے جس میں ہم نے اپنے مادر وطن سے محبت کا اظہار کیا ہے۔ انٹرنیٹ پر موجود اس وڈیو کو کافی پذیرائی مل رہی ہے۔ واضح رہے کہ رواں سال 2 کشمیری موسیقاروں نے روایتی سازوں کے ساتھ پاکستان کا قومی ترانہ گایا تھا جس کی وڈیو سوشل میڈیا پر وائرل ہو گئی تھی۔